Historiako eskolak testuinguru bikaina dira ikasleekin euskaldunon jatorria eta gure herriaren bilakaera lantzeko. DBHko 2. mailako ikasleek Erdi Aroa izan dute langai lehen hiruhilekoan, eta Iruñeko eta Nafarroako Erresumen izaera eta bilakaera izan dira mintzagai nagusiak.
Besteak beste, sakon aztertu dituzte 778. urteko Orreagako gudua –Baskoek Karlomagnoren gidaritzapean zeuden Frankoak garaitu zituztenekoa– eta 1522ko Amaiurko gudua –Nafarroako Erresumaren desagerpenerako mugarria–. Eta azken horri tiraka, Amaiurrera irteera egin dute lehenbizikoz, Aranzadiko ikasleak Ikastolaren eskutik Amaiur moduko leku sinboliko bat bisitatzeak duen garrantziaz jabetuta.
Irteerak bi ekintza nagusi izan ditu: alde batetik, museoa ezagutu eta gazteluaren bisita gidatua egin dute. Bestetik, herriko sarreran dagoen XVIII. mendeko errotan izan dira, taloak egin eta dastatzen.
Ikusi irteerako argazki-bilduma
