Azken egunotan ezagutu ditugun albisteek berriro ere agerian utzi dute euskarak eta euskarazko hezkuntzak etengabeko oztopoei aurre egin behar dietela gure herrian. Batetik, Seaskako ikasleek iragarri dute Baxoko matematikako azterketa euskaraz erantzungo dutela, Frantziako Estatuak euskaraz egiteko aukera ukatu dien arren. Ikasleek argi adierazi dute ez dutela onartuko beren hizkuntza eskubideak urratzen jarraitzea, eta desobedientzia ariketa kolektibo baten bidez aldarrikatuko dute euskaraz ikasi dutenek euskaraz ebaluatuak izateko duten eskubidea.
Bestetik, Nafarroan ere kezka handiz jarraitzen ari gara ikastolen aurka hartutako erabakiak. Horren harira, “Lodosako Adierazpena” gero eta babes gehiago jasotzen ari da. Nafarroako Hezkuntza Departamentuak hainbat ikasgela ixteko hartutako erabaki arbitrarioak kolokan jartzen ditu urte luzez herriz herri eta auzolanean eraikitako hezkuntza-proiektuak, eta zuzenean erasotzen du euskaraz ikasteko eskubidea.
Aranzadi Ikastolak gure babes eta elkartasun osoa helarazi nahi die egoera hau pairatzen ari diren ikasle, familia, irakasle eta komunitate guztiei. Ez dugu onartzen euskaraz bizi, ikasi eta hezi nahi duten herritarren eskubideak murriztea. Euskarazko hezkuntza ez da pribilegio bat: herri honetako milaka familiaren hautu legitimoa eta eskubidea da. Eta Euskal Herriko Ikastolak, sare nazional eta herritarra, da horren erakusgarri.
Ikastolak herritik sortutako proiektuak gara, komunitatea eraikitzen dugun espazioak, eta euskararen biziberritzean ezinbesteko eginkizuna dugu. Horregatik, euskararen aurkako eraso bakoitzaren aurrean elkartasunez eta irmotasunez erantzutea dagokigu. Gaur Seaskako ikasleak dira beren hizkuntza eskubideen alde altxatu direnak; gaur Nafarroako ikastolak dira beren etorkizuna defendatzen ari direnak. Baina auzia guztiona da, guztioi dagokigu.
Euskaraz ikasi nahi dugu, euskaraz bizi nahi dugu eta euskaraz etorkizuna eraikitzen jarraituko dugu.
