Skip to main content

Baiona: herria, euskara eta kultura eskutik helduta

Urtero legez, lehen hiruhilekoko azterketak bukatu bezain laster, irteera egin dugu batxilergoko ikasleekin. Lurraldetasunari keinu eginaz, Lapurdiko hiriburua bisitatu dugu eta, besteak beste, euskaraz idatzitako lehen liburua (Linguae Vasconum Primitiae) bertatik bertara ikusteko aukera izan dugu.

Argazkia2025_11_12_Batxi1-2_Baiona_ (6).jpg

Askorentzat ezezaguna den hiriko karriketan ibiltzeko aukeraz gain, euskal kulturarentzat garrantzitsuak diren elementu bat baino gehiagotara gerturatu gara. Alde batetik, arkitektura gotikoaren adibide esanguratsua den Baionako Katedrala bisitatu dugu. Bertan, artearen historiarekin lotutako hainbat argibide jaso ditugu, baita Frantziako Iraultza bezalako gertakari garrantzitsu batek gurean eraikitako monumentu erlijioso batean izandako eragina ere.

Bestetik, Baionako Euskal Museoan egon gara. Asko dira eraikinak gordetzen dituen altxorrak. Garai bateko janzkerak, hainbat altzari, frankismo garaian Iparraldean ospatutako jaialdi eta bestelako aldarrikapenen afixak edota joan den mende hasierako maskaraden irudiak.

Hala ere, euskaraz idatzitako lehen liburua ikustea izan da bereziena. Bernart Etxeparek idatzitako Linguae Vasconum Primitiae, hain zuzen ere. Normalean Parisen aurkitzen da gure hizkuntzan argitaratutako lehen liburu honen jatorrizko ale bakarra. Poema bilduma honek gure literaturan daukan garrantziaz hitz egiteko aukera eman digu, eta baita euskarak historian zehar izandako hedapena eta bilakaera politiko zein sozialaz aritzeko aitzakia ere.

Bazkal ostean, gaur egun Baionak daukan beste balio kultural batek hartu du protagonismoa. Urterik urte bertan ospatzen den street-art jaialdiko hainbat artelan identifikatu dituzte ikasleek. Azkarrenek bertako txokolatea jaso dute opari! 

Euskal Herriko txoko eder bat ezagututa itzuli gara etxera! 

Hemen dituzue ikusgai eguneko argazki batzuk:

Irudia
Irudia
Irudia
Irudia
Irudia
Orokorra

Murgiltze eredua egungo errealitatera egokitzeko eta indartzeko beharra izan da Euskal Herriko Ikastolen 30. Jardunaldi Pedagogikoetako hausnarketaren ardatz nagusia.

Orokorra

Udazken honetan ere, euskararen alde egiteko bi aukera eder ditugu eskura: Errigoraren eta Zuberoako ikastolen aldeko Ikaskoliren saski solidarioak. Bi ekimenek euskararen transmisioa, tokiko ekoizpena eta herrigintza…

Orokorra

Iazko estreinaldi arrakastatsuaren ostean, Bergarako Orientazio Probak bigarren urtez bete ditu herriko kaleak ilusioz eta kirol giroz. Guztira, 396 lagunek hartu dute parte aurtengo edizioan, 96 taldetan banatuta.…

Orokorra

Aurkezpen-ekitaldia azaroren 27an izango bada ere, lekukoa Aranzadi Ikastolan dugu dagoeneko. Gipuzkoako ikastolen izenean eta Euskal Herriko ikastola guztiekin elkarlanean, 50. urteurren gogoangarria antolatzera goaz.