Aranzadi Ikastolak, Bergarako Euskal Herrian Euskarazek eta Jardun Euskara Elkarteak elkarretaratzea egin dugu euskararen normalizazioaren alde eta hezkuntza-sisteman euskarak izan behar duen lekua aldarrikatzeko.
Azken asteetan unibertsitatera sartzeko probetako Euskara azterketaren inguruan sortutako eztabaidak kezka handia eragin du euskararen aldeko eragileen artean. Elkarretaratzean salatu dugu egoera hori baliatu dela euskararen normalizazioaren aurkako oldarraldia areagotzeko, eta, oraingoan, hezkuntza-sistema bera jarri dela jomugan.
Bertaratutakook nabarmendu dugu hezkuntza-sistemak funtsezko eginkizuna duela euskararen normalizazioan, eta kezkagarritzat jo dugu gai honen inguruan sortutako oldarraldi politiko, mediatiko eta judiziala. Gertatutakoak euskararen ofizialtasuna eta herritarren arteko berdintasuna kolokan jartzen ditu, eta gizarteari mezu arriskutsua helarazten dio: euskarak ez duela gaztelaniak adinako baliorik.
Era berean, babes osoa adierazi diegu egunero euskararen irakaskuntzan eta transmisioan lanean diharduten irakasleei. Aranzadi Ikastolatik azpimarratu nahi dugu irakasleon lana ezinbestekoa dela ikasleak euskaldun oso bilakatzeko, eta ikastetxeen, familien eta herriaren arteko elkarlana giltzarria dela euskararen biziberritzean aurrera egiteko.
Elkarretaratzean argi adierazi dugu arazoaren muina hizkuntza-ereduen sisteman dagoela. Aspaldidanik frogatuta dago A eta B ereduek ez dutela ikasle guztien euskalduntzea bermatzen, eta, ondorioz, milaka ikaslek euskaraz jabetzeko duten eskubidea urratzen dela. Horregatik, hizkuntza-ereduen sistema bertan behera uztea eta euskarazko ikasteredu orokortua ezartzea eskatu dugu, euskara gutxien duenari gehiago ematea ipar hartuta.
Aranzadi Ikastolatik, Bergarako Euskal Herrian Euskarazetik eta Jardun Euskara Elkartetik dei egin diegu herriko eragileei, familiei, ikasleei eta herritarrei euskaraz bizitzeko baldintza errealen alde lanean jarraitzeko. Ikastetxeetan, kalean, lagunartean, sarean eta bizitzako eremu guztietan euskaltzale gisa jabetzeak, ahalduntzeak eta antolatzeak garrantzia duelako.
Oldarraldiaren aurrean, justizia euskararentzat, eta euskara guztiontzat!
