Pasa den ikasturtean eraldaketa-prozesu sakonean murgildu zen Aranzadi Ikastola. Pedagogiari zentralitatea eman eta Ikastolen Elkarteko aholkularitzaren laguntzaz, Bagoiaz izeneko eraldaketa-prozesu bati ekin genion. Hasieratik izan dugu argi kontu bat: uneotan hezkuntza formalak ez diola erantzuten gure herriko haur eta gazteen beharrei, eta ezta herri gisa ditugun aukera eta mehatxu guztiei ere. Errealitate horri buelta eman nahian, honako galderak mahai gaineratu ditugu: zein da Ikastolan hezi nahi dugun pertsona-eredua? Zer nolako pertsonak behar ditu gure herriak?
Galdera horiei erantzuteak bere horretan dakar paradigma aldaketa oso bat. Izan ere, Ikastolak hezkuntza esparruan duen egitekoa bizitza osorako balio-sistema baten gainean eraikitzea eskatzen du. Eta, horretarako, ezinbesteko motorra komunitatea da: gurasoak, profesionalak eta ikasleak, elkarlanean.
Aurtengo ikasturtean prozesuak bi helburu nagusi izango ditu. Alde batetik, komunitate osoarekin batera eraldaketaren kontakizuna eztabaidatu, eraiki eta idaztea, bi galdera ardatz hartuta: zergatik behar dugu eraldaketa? Zertarako behar dugu eraldaketa? Bestetik, profesionalak (hezitzaile eta irakasleak) pedagogia egiteko moduei begira jartzea, alegia, irakasle-rolari, metodologiari...
Hari horri tiraka, eraldaketa gorpuzten ari diren hainbat Ikastola bisitatu ditugu, eta azkena aste honetan ezagutu dugu: Anoetako Herri Ikastola. Lekeitiko Azkue Ikastolako kideekin batera, Aranzadiko hezkuntza taldeko kideak eta DBHko irakasle batzuk izan gara bertan, beraien prozesuaren inguruan informatu eta uneotan ikasleekin praktikatzen dituzten esperientziak ezagutzeko. Pedagogia-bisita oso aberasgarria izan da, beste ikastola batzuen egiteko moduak ezagutu eta elkarrekin erronka berriei nola aurre egin hausnartzen aritu baikara.
