Odol-emaileen Elkarteari esker eta ekainaren 14an ospatu zen Odol-emaileen Nazioarteko Egunaren bueltan, Aranzadi Ikastolak hainbat sentsibilizazio ekintza antolatu ditu ikasleen artean odola ematearen garrantziaz jabetzeko.
Ekintza hauen helburu nagusia izan da odol-emaileen lana ikasleei ezagutaraztea eta odola emateak duen garrantziaz kontzientziatzea. Guztira 210 ikasle inguruk eta 14 irakaslek hartu dute parte antolatutako jardueretan.
Antolatutako ekintzak
Ekimenaren baitan, DBH4ko ikasleei zuzendutako sentsibilizazio hitzaldi bat eskaini genuen lehenik, eta parte hartzera animatzeko gonbitea luzatu genien. Ondoren, biologia eta teknologia irakasleen laguntzaz, DBH4ko ikasleek odolaren zirkulazioa erakusten duten maketak sortu zituzten. DBH1eko ikasleek, berriz, sentsibilizazio hitzaldi bat jaso zuten eta, jarraian, DBH4ko ikasleek egindako maketak ikusi eta azalpenak entzun zituzten. Azkenik, LH5 eta LH6ko ikasleei zuzendutako jardunaldietan, hitzaldiaren ostean, 11 laguneko taldetan odol-emaileen lana antzeztu zuten, eta amaieran DBH4ko ikasleen maketak ezagutzeko aukera izan zuten.
Kanpainaren helburuak
- Odol-emaileen elkartearekin harreman zuzena sortzea eta hezkuntza arloan egiten duten dibulgazio lanari laguntzea.
- Ikasleak eta irakasleak gaiaz sentsibilizatzea eta informazioa zabaltzea.
- Etorkizunean ere antzeko ekintzak antolatzen jarraitzea.
Odola ematea bizitza ematea dela gogoraraziz, Ikastolak konpromisoari eutsi eta lankidetza hau sendotzen jarraitzeko asmoa du. Mila esker parte hartu duzuen guztioi!
