Orientazio-departamentuaren zeregin nagusia da ikasle guzti-guztiei baliabideak modu orekatu eta osagarrian eskaintzea garapen arrakastatsua izan dezaten. Hau da, aniztasunari arreta eskaintzea.

Bide hori elkarlanean egiten da ikasle, irakasle, familia, Zuzendaritza Talde, kanpoko profesional nahiz herriko elkarte eta zerbitzuekin. Kasuaren arabera, beharrak Ikastolan bertan edo Ikastolatik kanpo kudeatzen dira.

Balio anitzeko lan-taldea dugu, eta koordinazio estua du Ikastolako gainerako profesionalekin. Ondorengo perfilek osatzen dute orientazio-departamentua.

AHOLKULARIAK ETA ORIENTATZAILEA

Etapaka banatuta daude, eta beraien zeregina da beharra duten ikasleei banakako harreta eskaini eta behar dituzten baliabideak eta estrategiak diseinatu eta koordinatzea.

DBH eta batxilergoaren kasuan, orientazioa ere sartzen da jokoan. Orientatzaileak ikasleei laguntzen die bizitza-proiektuak eraikitzeko behar dituzten gaitasunak eskuratzen, bai ikasketa-arloan, eta baita arlo pertsonalean ere. Horretarako, besteak beste, erabakiak hartzeko estrategiak lantzen dira.

PSIKOLOGOA

Laguntza psikologikoa behar duen ikasle ororen eskura dago Ikastolako psikologoak eskaintzen duen laguntza. Harremana banakakoa zein taldekoa izan liteke, eta familiarekin adostua. Ongizate emozionala zaintzeko Ikastolak eskaintzen duen bitartekoetako bat da.

PEDAGOGIA TERAPEUTIKOKO IRAKASLEAK (PT)

Beharra duten ikasleek laguntzarako irakasle bat izaten dute astean ordu zehatz batzuetan. Irakasle horien funtzioa da ikasketa-prozesuan indartu beharreko arloak modu pertsonalizatuan landu eta garatzea.

LOGOPEDA

Ikastolako logopedak ikasleen behaketak egiten ditu Haur Hezkuntzan, eta jarraibide batzuk eskaintzen dizkie beharra duten ikasleen familiei.

PSIKOMOTRIZISTA TERAPEUTA

Psikomotrizista terapeuta baten begirada ere badugu lan-taldean, eta lagungarria da haur batzuen portaerak ulertu eta baliabideak egoki diseinatzeko. Ez da bakarkako terapiarik eskaintzen –ez dago horretako baldintzarik–, baina psikomotrizista-taldea eta tutorea orientatzen ditu.

HEZKUNTZA-LAGUNTZAILEAK

Beharra duten ikasleek hezkuntza-laguntzaile bat izan dezakete, baldin eta Hezkuntza Sailak baliabide gehigarri hori onartzen badie. Profesional hauen egitekoa da ikasleei denbora osoko arreta pertsonalizatua eskaintzea, taldean aritzeko trebeziak gara ditzaten.

HIPI IRAKASLEA

Euskal Herrira etorri berritan, euskara ikastea da lehen premisa. Eskola-orduetan ikasketa-plan pertsonalizatua izateaz gain, Ikastolak euskara-errefortzu pertsonalizatua eskaintzen die euskara ikasten diharduten ikasleei.

Orientazio-departamentuko profesionalen lana ikusezina da sarritan, baina Ikastolaren hezkuntza-praktikaren hezurmuina osatzen dute. 

Ikaslea bere osotasunean behatzen dute, eta bide-orri bat diseinatzen dute arrakastarako aukerak biderka ditzan. Bide horrek ertz asko izan ditzake: alderdi emozionala, ikasketa-arloa, esparru soziala, muga fisikoak, garapen motorea... Horiei guztiei erantzuna emateko, ondorengo lan-ildoak jorratzen dituzte:

• Ikasleen behaketa.
• Familien aholkularitza.
• Banakako zein taldeko esku-hartzeak.
• Berariazko programen jarraipena.
• Aspektu esanguratsuen neurketa balorazio edo test bidez.
• Koordinazio irakasle eta tutoreekin.
• Koordinazioa kanpoko sareekin.

Departamentu honen lanak berebiziko garratzia du Ikastola inklusiboa eraikitzeko bidean. Hau da, denentzako Ikastola, haur eta nerabeek ahalik eta garapen pertsonal handiena lortzeko.

Ardura hori hezkuntza-komunitate osoarena da, eta Aranzadik egunero egiten du lan kalitatezko hezkuntza ez ezik, ikasleen aukera-berdintasuna, justizia eta ekitatea bermatzeko.