Lehen Hezkuntzako etapak 6-12 urte bitarteko ikasleak hartzen ditu. Etapa honetako oinarrizko ikaskuntza dira irakurketa, idazketa, ahozko gaitasuna, matematika eta autonomiaren garapena.

Errealitate hurbileko egoeretan kokatzen dugu ikaskuntza, eta ikasleen funtsezko konpetentziak garatzea dugu helburu. Horretarako, Euskal Curriculumean ardazten diren ikas-material propioak baliatzen ditugu.

KIMU LH 1-2-3

Lehen Hezkuntzako lehenengo hiru mailetara bideratutako proiektua da Kimu. LH 1. eta 2. mailak hiru proposamen didaktikotan egituratuta daude: Erronka, Euskara eta literatura eta Matematika. LH 3. mailan Gaztelania eta literatura ere gehitzen zaie. Guztien arteko lotura eta osagarritasuna bermatuta daude, eta material manipulatiboa dute oinarri.

ERRONKA

Ikaslearen errealitate hurbilean kokatzen da ikaskuntza, eta unitate didaktiko bakoitzak interesgune jakin bat du ardatz. Ikas-egoera bat aurkezten zaie ikasleei, eta berau ebazteko, hainbat diziplinetako konpetentzia espezifikoak eta funtsezko konpetentziak landu behar dituzte. Bide horretan, sormena eta eztabaida sustatzen ditugu, ikasleen jakin-mina piztuz. Bestalde, hizkuntzaren komunikazio-ikuspegia du oinarrian.

EUSKARA ETA LITERATURA

Irakurketak eta idazketak berebiziko garrantzia dute Lehen Hezkuntzan, bereziki lehen zikloan, urte horietan finkatzen baitira komunikaziorako konpetentziaren oinarriak. Idazten eta irakurtzen ikasteko, idatzi eta irakurri egin behar da, eta besteek nola idazten eta irakurtzen duten ikusi; probatuz eta huts eginez, beti ere testuetan esanahiak bilatuz edota esanahia duten testuak sortuz.

Horrez gain, garrantzia handia ematen diogu heziketa literarioari, eta haur-literaturan oinarritzen gara. Euskal literaturan erreferente diren idazle eta ilustratzaileek berariaz Kimu proiekturako sorturiko obra literarioak dira proposamenaren oinarri eta abiapuntu.

MATEMATIKA

Hurbileko errealitatea betaurreko matematikoekin ikustetik abiatuta, inguruan dugun matematikaren funtzioa identifikatzea eta ulertzea dugu helburu. Jolasaren, ikerketaren eta behaketaren bidez, ikasleek matematikarako konpetentzia garatzen dute. Kontzeptuak eta prozedurak ulertzen laguntzeko, manipulazioa baliatzen dugu. Proposamena oinarrizko bost zutabetan egituratzen da: unitate didaktikoak, desafioak, errutinak, ikerketak eta jokoak.

GAZTELANIA ETA LITERATURA

LHko 3. mailan hasten dira ikasleak gaztelania lantzen. Hain zuzen, irakurketa eta idazketa euskaraz finkatu ostean –nahiz eta jakin prozesu iraunkorra dela–. Irakurmena eta ahozko zein idatzizko adierazpena lantzen ditugu, eta hiztegia aberastu, modu zuzen eta formalean hitz egin eta idazteko. Horretarako, hainbat testu-genero eta komunikazio-ekintza erabiltzen ditugu.

Haur Hezkuntzako praktikari jarraipena emanez, LHko lehen bi mailetan ere adimen anitzak lantzen ditugu, material aproposez hornitutako guneen bidez.

Lehenengo eta bigarren mailako ikasleek elkarrekin gauzatzen dute dinamika hau astean lau orduz, adinen arteko interakzioak ikasketa-prozesua aberasten baitu.

Etapa honetan pertsonek bizitza osoan zehar izango dituzten ikaskuntzetarako oinarri sendoak lantzen ditugu.

HAMARRETAKOA

LH 1-2ko haurrek, HHkoekin batera, hamarretako inklusiboaren dinamikan parte hartzen dute. Ikastolak kudeatzen du jatordu hori, eta haurrek, modu kolektiboan, proiektua gorpuzten dute.

Asteko lau egunetan sasoiko fruta ekologikoa jaten dute, eta astean behin osoko ogia oliba-olio birjina estrarekin. Elikagai horiek guztiak Elikaenearen eta Errigoraren bidez jasotzen ditugu, eta beraiek arduratzen dira gertuko ekoizle txikiekin zuzeneko harremana egin eta horniketa bermatzeaz. Bertako fruta –zitrikoak salbu–, Arrasateko artisau-ogia, Nafarroako olioa... izaten ditugu, besteak beste.

Egitasmo honek hainbat helburu du, baina bat da nagusia: haur guztiek hamarretako berbera partekatzea, desberdintasun sozial eta ekonomikoak atzean utziz. Horrez gain, haurren autonomian eragin nahi dugu; horregatik, haurrak beraiek arduratzen dira prozesu osoaz –elikagaien bila joan, geletan banatu, fruta garbitu, dena jaso...–. Bide batez, otordu osasungarrien aldeko apustua ere egin dugu, eta tokiko garapenari bultzada eman nahi diogu, agroekologiaren aldeko mugimendura batuz.

EKI LH 4-5-6

Diziplinarteko izaera duen proiektua da EKI: Euskal Curriculumean ardaztua (E), konpetentzietan oinarritua (K) eta Integrazioaren Pedagogian gorpuztua (I).

Konpetentziak ikas-egoera errealetan lantzen, garatzen eta ebaluatzen dira, eta egorea horiek eskatzen dute diziplina bat baino gehiagotan landutako baliabideak modu integratuan aplikatzea.

Egoerei aurre egiteko erronkak bakarka zein taldean gauzatzen ditugu, ikasketa-prozesuan behar besteko espazioa emanez bi lan-moduei. Hala, bilatzen duguna da ikaslea bera bere ikaskuntza-bidearen jabe bihurtzea; horretarako, autozuzenketa eta autorregulazio-jarduerak eskaintzen dizkiegu.

EBALUAZIO HEZIGARRIA

Ebaluazioa etengabeko prozesu gisa ulertzen dugu, bitarteko bat baita ikasleen ikaskuntza-prozesua hobetzeko. Baina, nola bihurtzen da ikasle bat bere ikasketa-prozesuaren jabe? Giltza majikoa ez dauka inork, baina gurean hainbat pauta betetzen dugu errealitate horretara gerturatzeko:

Ikasleei aldez aurretik aurkezten dizkiegu helburuak eta konpetentziak.
Konpetentzien ebaluazio jarraia aplikatzen dugu.
Ikas-prozesuan zehar, kalitatezko feedback-a ematen diegu, ahoz zein idatziz.
Askotariko ebaluazio-tresnak baliatzen ditugu: aurkezpenak, talde-lanak, azterketak, ariketak...
Ikasleak autoebaluatu egiten dira, baita elkarren artean koebaluatu ere.
Lau lorpen-maila ezartzen ditugu: apala, oinarrizkoa, egokia eta bikaina.

DIGITALIZAZIOA

Aranzadi Ikastolan ikasleek LHko 4. mailan izaten dute lehen kontaktua ikasketa-prozesurako gailu digitalekin. Momentu horretan hasten dira konpetentzia digital konektatura gerturatzen.

Laugarren mailan ikasleek astean ordubete egiten dute digitalki –Pentsaera Konputazionala jakintzagaia–. Bost eta seigarren mailetan, aldiz, jakintzagai bat –Natur Zientziak– digitalki garatzen dute, arlo horren ezaugarriegatik, baliabide digitalek ikasketa-prozesua aberastu egiten baitute. Halere, astean berariaz lau ikas-ordu –Natur Zientziak eta Pentsaera Konputazionala– egiten dituzte pantaila aurrean, eta gailua ez dute etxera eramaten.

Ikastolak bi lan-lerro ditu gai honi dagokionean: alde batetik, ikasleek ikasketa-prozesurako erabiltzen dituzten gailu digitalen erabilera seguru eta arduratsua sustatzea. Bestetik, gailu digitalen laguntzarekin konpetentzia digital konektatua garatzeko ezinbestekoak diren zereginak gauzatzea –testuinguruak kontuan hartuta, beti ere–. Hala, azken ideia horrek zerikusi zuzena du azken urteetan bizitzako hainbat esparru –hezkuntza barne– gain-digitalizatzeko egon den joerarekin.