Jantokian eskaintzen ditugun jaki guztiak Ikastolako sukaldean prestatzen ditugu egunean bertan. Lehengaiak bi bidetatik lortzen ditugu: alde batetik, Ausolanek hornitzen du sukaldea. Bestetik, astean behin bertako eta sasoiko elikagai ekologikoak jasotzen ditugu Elikaenearen bidez –momentuz, barazkiak eta jogurta–.

Uneotan, jangela-eredua eraldatzeko prozesu betean gaude. Alde batetik, elikagaien horniketa lantzen dihardugu, Km.0 filosofiari eutsiz. Bestetik, etxeko otorduetan sakontzeko bidea arakatzen ari gara, menuen nutrizio-oreka eta haurren asebetetzea uztartuz. Finean, proiektu bat eraikitzen ari gara ingelesez slow food delakoa bultzatzeko.

Helburua garbia da, baina bidea ez da erraza. Oreka lortu behar da zerbitzuaren bideragarritasunaren eta proiektuaren helburuen artean. Bide horretan, beste ikastetxe batzuetako jantoki-proiektuak bisitatu eta ezagutzen ari gara, Aranzadirentzat baliagarria izan daitekeen formularen bila.

ALERGIAK ETA BESTELAKO ELIKADURA-AUKERAK

Ikastolako sukaldean askotariko intolerantzia eta alergiak kudeatzen ditugu, eta bazkaltiarrei jatordu segurua eskaintzen diegu, beraien osasuna zain dezaten. Halaber, ideia eta sinesmenen gainean eraikitako dietei ere lekua egiten diegu, jatordua bera guztiontzako inklusiboa izan dadin.

IRIZPIDE OROKORRAK

• Autonomia landu (mahai-tresnen erabilera, mahai-zapiaren erabilera, eskuen garbiketa…).

• Jatera ez behartu, animatu.

• Hizkuntza eredugarri eta hezigarria erabili “umeen hizkuntza” ekidin (“txitxi”, “a papa”…).

• Jatea oinarrizko eskubidea da. Ez da erabiliko ez sari ez zigor moduan.

• Euskararen erabilera bultzatu.

• Haurraren izena erabili lotura afektiboak eta emozionalak indartzeko.

• Haurren arteko aniztasuna errespetatu, erritmo eta izaera desberdinak kontuan hartu. 

• Giro atsegina lortzeko, kooperazioz eta laguntasunez jokatu.

INFORMAZIO PRAKTIKOA

Beharra duen ikasle orok erabil dezake zerbitzua, ikasturte osoan zehar zein egun solteetan, nahieran. Zerbitzua modu ez-iraunkorrean erabili nahi duenak egun bat lehenago eman behar du abisua idazkaritzan, 13:00ak baino lehen.

Jantokiko aforoa 106 bazkaltiarrekoa da, eta gaur egun hiru txandatan bazkaltzen dute Ikastolako ikasleek:

• 1. txanda 12:30 - 13:15 | HH 2-5 eta LH 1-2.

• 2. txanda 13:15 - 13:55 | LH 3-6.

• 3. txanda 14:00 - 14:30 | DBH.