Haurrak bizitzako lehenengo sei urteetan du bere garapen-ahalmenik handiena. Etapa horretan hasiko da lantzen adimenaren gaitasunak, nortasun-ezaugarriak, gorputzaren ahalmenak eta gizarteratze eta harremanetarako oinarriak.

Horregatik, Haur Hezkuntzan Konfiantzaren Pedagogian oinarritutako hIZAN proiektua lantzen dugu. Bide hori haurtzaindegian hasten da, Haur Hezkuntzako lehen etapan. Zehazki, 0-2 urte bitarteko haurrak hartzen ditu.

HAURRA ERDIGUNEAN

Haurren behar fisiologiko eta emozionalak asetzea da espazio honen helburu nagusia. Horretarako, hiru premisa ditugu: errespetuzko zaintza-momentuak ahalbideratzea, espazio ziurra sortzea eta haurraren berezko garapena bermatzea.

HH 0 eta HH 1eko haurrek espazio bera partekatzen dute, eta elkarren arteko interakzioak asko aberasten du garapen-prozesua. Izan ere, imitazioaren bidez, txikiek nagusiengandik ikasten dute, eta nagusiek zaintzaren kontzeptuak barneratzen dituzte. Espazio zabala dute eskura, eta eguneroko errutinen bidez, haurrek espazioaren ertz bakoitzari funtzio zehatz bat esleitzen diote –eraiki eta deseraiki egin daitekeena–. Hau da, muga fisikorik egon ez arren, ongi bereizten dituzte jantokia, ipuinen txokoa, mugimenduari bide emateko espazioak, lasai egotekoak, etab.

Haurrek, helduen zuzeneko esku-hartzerik gabe, beraien jarduera autonomoa garatzen dute. Hezitzaileek, aldiz, segurtasun emozionala eta afektiboa ematen diete, espazioan barrena ziurtasunez senti daitezen. Talde-dinamika gidatuak ere gauzatzen ditugu (haur-literatura, musika, dantza librea...), eta eguraldia lagun dugunean, kanpo espazioak esploratzeko aukera eskaintzen digu.

BEREZKO GARAPENA

Haur txikia gai da bere gorputzaren eta horren mugimenduaren kontzientzia pixkanaka garatzeko. Izan ere, garapen psikologiko, kognitibo eta emozional orekatua garapen-motore orekatuaren esku doa. 

Horregatik, errespetuzko akonpainamendua proposatzen dugu haurra lurrean buruz gora etzanda egon, buelta eman, katamar egin, eseri eta oinez egite prozesuan. Ez dugu behartzen berez lortu ez duen gorputz-jarrera hartzera.

JOLAS SINBOLIKOA

Haurrari diseinu oso espezifikoa duten jostailuak ematen dizkiogunean (lanerako tresnak, jostailuzko katilu eta platerak, argiak eta soinuak dituzten autoak, etab.) ez da jolas sinbolikoa sortzen ari, jolas literala sortzen du –helduok imitatu besterik ez du egiten–.
 

Jolas sinbolikoa haurrak material, jostailu edo objektu baten gainean zerbait ezberdina birsortzen duenean sortzen da, hau da, harriekin autoetan jolasten duenean edo harri horiek txanpon bihurtzen dituenean, egur batzuei plantxa baten balioa ematen dienean...

Horregatik, haurtzaindegian ez dugu ez etxetxorik, ez sukalderik, ez gisa horretako elementurik. Pedagogia-hautu kontzientea da, jolas sinbolikoaren onuretan sinesten dugulako:

• Pentsamendu sortzailea estimulatzen du: objektu mota hauek ez dute funtzio argirik, beraz, haurrak eman behar die helburu bat, eta nahi dituen istorioak sortu behar ditu.
• Haurraren eboluzio-etapara egokitzen dira: material horiek helburu zehatzik ez dutenez eta gutxi landuta daudenez, urte gehiagoz lagunduko diote haurrari, haren garapenera eta interes-aldaketara egokituko baitira.
• Gain estimulazioa saihesten du: ez dago argirik eta ez dago soinurik, beraz, ez dago kanpoko estimulurik, haurrak berak sortu behar ditu.
   

Haurra jolas sinbolikorako gaitasuna garatzen hasten denean (18 hilabete inguru), definizio zehatzik gabeko eraikuntzak aurkituko ditu Ikastolan, eta forma eta funtzio zehatzik gabeko materialak izango ditu eskura. Espazioan zenbat eta material eta objektu ez-egituratu gehiago egon, haurrak orduan eta aukera gehiago izango du jolas sortzaileak eta irudimen handikoak eraikitzeko.

JATORDUAK

Jatorduak zaintza-momentu oso garrantzitsuak dira. Une atsegin gisa bizi ditugu, eta konfiantzan eta lasaitasunean oinarritzen gara.

Gurasoek etxetik ekartzen dute seme edota alabarentzako janaria. Hala, familiak ziurtatuta du etxeko elikadura-ohiturei jarraipena ematea, eta errespetuz bizi dugu prozesu hori.

Adinaren arabera, haurrek taldeka bazkaltzen dute; txikienek biberoia hezitzaileen besoetan etzanda, beraien kabuz esertzen ikasi dutenek haur-aulki altuan, eta autonomia gehiago dutenek mahaiaren bueltan, talde txikian elkarrekin. Modu autonomoan jan dezaten sustatzen dugu, baina mugak ezarrita: janaria ez da jolasa.

LOA

Atseden-uneak ezinbestekoak dira haurraren garapenerako. Zaintza-momentu hori txikien beharretara egokitzen dugu, eta familiarekin partekatzen dugu.

Sehaska-gela bat dugu lotarako espazioa gainerakotik bereizteko. Lo hartzerako momentuan errespetuzko akonpainamendua eskaintzen dugu, eta kontuan hartzen ditugu haur bakoitzaren modu zein denborak.

Ratioak Hezkuntza Sailak ezartzen baditu ere, Ikastolak lehentasuna ematen dio etapa honetan behar beste hezitzaile izateari.

Ikasturte honetan, esaterako, hezitzaile bat izan dugu 5-6 haurrentzat. Kalitatea bermatzeko neurrietako bat da.

EGUTEGIA ETA ORDUTEGIA

Familientzako zerbitzu-ikuspegitik, egutegi eta ordutegi malgua eskaintzen dugu. Haurtzaindegia irekita egoten da egunero 7:00-19:00 tartean, eta familiak erabakitzen du zein ordutegi komeni zaion. Gainera neguko eta udaberriko oporretan eta uztailean zerbitzu berbera eskaintzen dugu –ordutegia familien eskarira moldatzen dugu–.

Kalitatezko hezkuntza lantzeaz gain, Ikastolak badu familien kontziliazioan laguntzeko helburua. Eskola arautuko eskaintzaz gain, ezinbesteko lan-lerroak dira zerbitzuak, bizi garen gizarteak errealitate hori jartzen baitugu parez pare. Hortaz, guretzat garrantzitsuak dira eskolaz kanpoko pedagogia-jarduera osagarriak eta zerbitzuen malgutasuna.

Guraso eta hezitzaileok egunero izaten dugu aurrez aurreko hartu-emana Ikastolara sartu-irtenetan. Gainera, eguneroko bat partekatzen dugu, etxeko eta Ikastolako hainbat daturekin.

Horrez gain, ikasturtean birritan garapen-txostenak eskaintzen dizkiegu gurasoei, eta aurrez aurreko bilerak ere egiten ditugu, bai hezitzaileek eta baita gurasoek ere beharra ikusten dugun aldiro.