Hezkuntza-kooperatiba gisa antolatzen gara, eta herriko guraso zein profesionalek sustengatu eta gidatzen dugu proiektua, elkarlanean.
754 ikasle, 457 familia eta 67 profesionalek osatzen dugun komunitatea gara. 1971. urtean Bergarako guraso euskaltzale batzuek sortua, urtez urte auzolanaren bidez eraiki dugu 0-18 urte bitarteko hezkuntza integrala eskaintzen duen etxea, gure bigarren etxea.
Herri Onura izendapena duen erakundea gara, herritik sortua eta herriari eskainia garelako. Gainera, izaera publikoa dugu, eta irabazi asmorik gabeko kooperatiba gara.
Herri-ekimen bat da Aranzadi Ikastola, eta zuzenean administrazioaren menpe ez badago ere, zerbitzu publikoa eskaintzen du, guztiontzat zabalik dagoelako, herritarrek gobernatzen dutelako, irabazi asmorik ez duelako eta hainbat herri-erakunderekin elkarlanean diharduelako.
Euskal Herriko 114 ikastolak osatzen dugu Ikastolen Elkartea. Hain justu, gure herriaren administrazio-mugez gaindi euskara eta euskal kultura iraunarazi eta indartzeko. Hezkuntza- eta herri-proiektu bateratua dugu, eta Euskal Curriculuma ardatz, pedagogia eta ikasmaterial propioak sortu eta garatzen ditugu.
Ikastolon hezkuntza-eredua pertsonaren garapenean zentraturiko proposamena da. Horrek esan nahi du ulertzen dugula gure egitekoa pertsona bere dimentsio guztietan (soziala, kognitiboa, motorra, emozionala, existentziala…) garatzen laguntzea dela, askotariko eremuetako ezagutzak eraikitzen laguntzetik harago.
Alegia, egiten ikastetik harago, izaten ikasteko hezkuntza-proposamena garatzen dugu. Izan ere, herri eta nazioen arrakasta, gure ustez, ez da neurtzen soilik herri edo nazio horien gizartea osatzen duten pertsonek dakitenaren arabera, pertsona horien giza-kalitatearen arabera baizik.
Barne-sendotasuna duten pertsona euskaldun, ekintzaile-erabakitzaile, kooperatibo eta eraldatzaileak hezteko konpromisoa dugu, bizitza osoan zehar ezaugarri eta balio-sistema horiek gara ditzaten.
IKASTOLA-EREDUA
Ikastola autoeraketa komunitarioaren praxia da, hezkuntza euskalduna sortu eta garatzea helburu duena, eta elkarlanetik hezkuntza-eredu propioa eraiki duena, Euskal Herriko zazpi herrialdeetan.
Ikastolok hirugarren bide bat eskaintzen dugu hezkuntzan, publikoa eta pribatuaren logikatik at. Bide hori titulartasun sozialarena da, eta gizarte zibilaren parte-hartzean oinarritzen da. Eredu komunitarioan sinesten dugu, non admistrazio publikoaz gain, herritarrok izango garen hezkuntza-proiektuaren gaineko hitza eta erabakia dugunak.
BERGARAN, BERGARARROK
Ikastola bakoitzak bide propioa eraiki du bere herrian. Guk, Bergaran, bergararrontzat bizigarria den proiektua lantzen dugu. Gure herriak, bere ezaugarri eta errealitateekin, badu hainbat erronka, eta horiei erantzuna emateko tresna da Ikastola.
Konpromisoa dugu Bergara euskaldun, iraunkor, inklusibo, feminista, solidario, orekatu eta irisgarriagoa eraikitzen laguntzeko. Horregatik, aliantzak ditugu herri-mailako sare, egitasmo eta kolektiboekin.
Herria eraikitzeko, uste dugu biderik egokiena dela Bergarako haur eta nerabeen hezkuntzaren inguruko erabakiak bergararron esku egotea, eta Ikastolak aukera hori ematen digu.
ARANZADI DA...
Euskararen kabia. Euskaratik eta euskaraz bizi dugu Bergara, gure herria.
Ikastola eta familiaren arteko sinbiosia. Konfiantza, elkarlana eta metamorfosia.
Ideia eraldatzaileen laborategia. Ikasitakoa desikasten ikasteko harrobia.
Komunitate bizia, mugimendua, lankidetza, solidaritatea eta enpatia.
Bergarako familia askoren bigarren etxea. Gertukoa, maitasunez betea.
Espazio askea, bizitza-proiektu libre eta bide-propioen aterpea.
Kalitatea. Norbere burua ezagutu eta garatzeko atea.
Pedagogia, elkar entzutea.
ETORKIZUNA
Gure haur eta gazteei zer-nolako etorkizuna utzi nahi diegun irudikatzea bezain garrantzitsua da etorkizunerako zer-nolako pertsonak nahi ditugun pentsatzea. Horregatik, pertsona-ereduan oinarritzen da gure jarduna.
ERALDAKETA
Ikastolon bokazioa da gizartea eraldatu, hobetuko duten herritarrak heztea. Horretarako, Aranzadi bidelagun izango da honako bost bereizgarriak lantzeko: euskalduntasuna, barne-sendotasuna, erabakitzaile-ekintzailetza, eraldaketa eta kooperazioa.