Eskola kirolaren helburu nagusia haur guztiengan jarduera fisikoa egiteko eskubidea bermatzea da. Gaztetxoek eskola aldian (baina eskola orduetatik kanpo) egiten duten kirol-jarduera antolatua da. Herri-mailan antolatzen da, eta Bergarako Udalak esku-hartze zuzena du.
Aranzadi Ikastolak, Eskola Kirolaren eta bestelako kirol-jardueren bidez, kirol-ohitura sortzen du ikasleen artean: kirol-eskaintza sustatu, erraztu eta antolatzen du, eta ikasleei kirol-jardueran dauden askotariko aukerak eskaintzen dizkie beraien hezkuntza-garapena osatzeko. Uneotan, Aranzadiko Lehen Hezkuntzako ikasleen %97,53ak egiten du kirol-jardueraren bat jarraikortasunez; %71,38ak multikirolean eta %26,15ak bestelako kirol-elkarteren batean.
ESKOLA KIROLAREN HELBURU OROKORRAK
- Euskararen erabilera sustatu eta bermatzea.
- Kirolaren eta jarduera fisikoaren balioak zabalduko dituen kultura sustatzea.
- Elkarbizitza sustatzea: gure kirol-taldeek Ikastola ordezkatzen duten heinean, txikitatik landuko ditugu autoestima eta autokonfiantza balioak, eta baita egoera desberdinetan agertu beharreko jarrerak ere: emakumezko eta gizonezkoen arteko berdintasuna, tolerantzia, integrazioa, aniztasuna, elkartasuna, kiroltasuna, epaileei zein beste taldeetako jokalariei erakutsi beharreko errespetua, joko garbiaren balioa, norberaren erantzukizuna eta konpromisoa, joko-arauekiko begirunea…
JOLASHEZI
Aurrebenjaminak eskola-kiroleko partaiderik txikienak dira (LH1-2, 7-8 urte), eta Jolashezi programa dute ardatz. Programa horrek jolasa du tresna nagusia eta lehiaketarik gabeko testuingurua bermatzen du, abilezia mota desberdinak dituzten haurren partaidetza sustatuz.
Ikasturtean zehar sei topaketa izaten dituzte, eta astero-astero bi saio, arratsaldez. Topaketen helburua da jarduera fisikoaren bitartez gozatu eta beste haur batzuekin harremantzea.
MULTIKIROLA
Kirol anitzeko hastapen-programa da, tokikoa, komunitarioa, haurrak erdigunean jartzen dituena eta lehiaketara bakarrik bideratuta ez dagoena. Herriko kirol-eskaintza kontuan izanda antolatzen da bertako programa, herriko klub eta taldeak sustatzeko asmoz. Benjaminek (LH3-4, 9-10 urte) eta alebinek (LH5-6, 11-12 urte) hartzen dute parte, eta astean bi saio izateaz gain, asteburuetan topaketak edo lehiaketak izaten dituzte.
Topaketen helburua hegemonikoak ez diren jarduerei ikusgarritasuna ematea eta gaztetxoen kirol-esperientzia zabaltzea da, lehiaketa-kutsurik gabe. Lehiaketetan, berriz, Bergarako kirol-taldeei ikusgarritasuna ematen zaie, aurrera begira jarraipena izan dezaten.
MENDIZALETASUNA
Multikirol programatik aparte dagoen arren, eskola kirolaren baitan kokatzen da mendizaletasuna. Bergarako hiru ikastetxeek mendi-irteerak egiten dituzte elkarrekin, Bergarako nahiz inguruetako bazterrak ezagutuz. Eskaintza hau LHko haur eta familia guztiei zuzenduta dago.
Urtean zehar sei mendi-irteera egiten dituzte, igandeak familia- eta natura-giroan gozatzeko.
[GURASOAK] JOKO GARBIAREN DEKALOGOA
- Umeek ez dute jolasten jendea entretenitzeko, ezta garaile izateko ere. Umeek jolasten dute ondo pasatzeko.
- Txalotu itzazu parte hartzaile guztien ahaleginak. Emaitza ez da garrantzitsuena.
- Ez iezaiezu haserre egin hutsegiteengatik, ikasten ari dira-eta. Diozun guztia positiboa izan dadila.
- Azal ezazu jardueran parte hartzen duten guztienganako begirunea (ikasleak, entrenatzaileak, arbitroak, gainerako guraso eta ikusleak…).
- Eman umeei jardueraz gozatzeko eta erabakiak hartzeko askatasuna.
- Errespeta itzazu epaileen erabakiak eta anima itzazu umeak hori egitera eta ezarritako araudiaren arabera jokatzera.
- Baztertu indarkeria eta jarrera desegokiak.
- Jarduerari amaitzean, balora ezazu bakoitzaren hobekuntza, ez lortutako emaitza.
- Ahalegindu ikusleek arau hauek bete ditzaten, jarduera guztientzat onuragarria izan dadin.
- Zure portaera eredua izango da zure seme-alabentzat.
