Psikomotrizitate-praktika mugimenduaren bidez umeen heltze psikologikoa helburu duen praktika bat da. Psikomotrizitatea da haurraren bizitzako oinarrietako bat. Umeak garapen harmonikoa bizitzeko aukera izan dezan, jolasa, adierazpen librea eta bat-batekotasuna lantzen ditu.
Hiru dira helburu nagusiak: alde batetik, haurra mundura zabaltzea komunikazioan eta harremanetan oinarrituz. Bestetik, umeak aukera izatea jolasaren bidez mundu sortzailea eraiki eta bizitzeko. Eta, azkenik, baliabideak eskaintzea haurrak hazte-prozesu autonomoa bizitzeko eta bere buruarengan konfiantza sortzeko.
Psikomotrizitate-praktikaren helburua da haurrei arreta handiz aztertu eta prestatutako espazio bat eskaintzea, garapen osasuntsua izateko beharrezkoak diren heltze psikologikoko prozesuei aurre egiteko baliabide propioak gara ditzaten.
Espazio horretan profesional bat dago, eta formakuntza sendoa eta zorrotza du hainbat jarreratan, hala nola entzumenean, enpatian, laguntzan, harreran, sostenguan, segurtasunean eta ekintzei eusteko gaitasunean, haurren mugimenduan eta jolasetan, bai eta haien ulermenean eta zentzuan ere.
Ikastolako 2, 3, 4 eta 5 urteko haur guzti-guztiek izaten dute eskola-orduetan heziketarako psikomotrizitate-saioa astero-astero, psikomotrizista profesional batekin. Halere, eskolaz kanpoko zerbitzu gisa ere eskaintzen dugu, diziplina honek berebiziko garrantzia baitu Aranzadiren pedagogia-proiektuan. Hain zuzen ere, psikomotrizitate-praktika espazio eta denboren pedagogian oinarritzen da: umeak jolasteko eta mugitzeko plazeretik pentsatzeko plazerera doan prozesua garatu dezake psikomotrizitate-gelan.
INFORMAZIO PRAKTIKOA
- Emailea: psikomotrizista hezitzailea (titulatua).
- Mailak: HH 4 eta 5.
- Ordutegia: 17:00 - 18:30.
- Denbora-tartea: urria hasieratik, maiatza amaierara.
- Prezioa: hilean 40 euro.
- Taldea: gutxienez 10, gehienez 15.
- Tokia: Ikastolako psikomotrizitate-gela.
