Gure ikastola

Aranzadi Ikastola 746 ikasle, 452 familia eta 69 profesionalek osatzen dugun komunitate handia gara. Hezkuntza-kooperatiba gisa antolatzen gara, eta familiak (gurasoak) dira berau sustengatzen dutenak.

Familiak haurra jaio eta lau hilabetera egin daitezke kooperatibako bazkide, eta batxilergoa bukatu arte egon daitezke gurean. 0-18 urte bitarteko hezkuntza osatua eskaintzen diegu gure ikasleei, eta lanean dihardugu egunez egun punta-puntako ikastetxea eraikitzen jarraitzeko.

Gure ikastola Bergarako guraso batzuek sortu zuten 1971. urtean, herrian eskola euskalduna eta berritzailea nahi zutelako. Orduz geroztik, auzolanean eraiki eta eraberritu dugu proiektua. Izpiritu horri eutsi diogu gaur egun arte, eta Herri Onura izendapena jaso dugu, herritik sortua eta herriari eskainia garelako. Gainera, izaera publikoa dugu eta irabazi asmorik gabeko erakundea gara.

Baina bidea ez dugu bakarrik egin: Euskal Herriko Ikastolen Elkarteko kideak gara. Euskal Herri osoko 110 ikastolek osatzen dugu elkartea, eta hezkuntza-eredu propioa lantzen dugu: euskal curriculuma ardatz, ikasmaterial propioak sortzen ditugu, eta aitzindariak gara irakasleen prestakuntzan.

Gainera, Bergarako hezkuntza-komunitatea ez dugu guk bakarrik osatzen. Herrian badago beste hainbat ikastetxe: administrazio publikoaren menpekoak (San Martin, Ipintza eta Miguel Altuna) eta kristau-eskola (Mariaren Lagundia). Guztion artean askotariko hezkuntza-paisaia osatzen dugu.

    

Gure ikusmira

Bizitzako egoera errealei aurre egiteko gaitasunak dituzten ikasleak hezi nahi ditugu. Erreferentziazko ikastetxe aurrerakoi eta euskaltzalea izateko egiten dugu lan, eta guraso eta langile profesionalen arteko lankidetza da gure jardunaren oinarria. Hezkuntza- eta kultura-eragilea izan nahi dugu, parte hartzailea, gertukoa, etengabeko hobekuntzan oinarritua eta nortasun juridiko propioa duena.

Gure egitekoa

Euskal Herria abiapuntutzat hartuz eta kudeaketa autonomoa eta nortasun propioa baliatuz, gure egiteko nagusia da gure herriak behar dituen pertsona kritikoak berdintasunean heztea (norbanako gisa zein gizarteko kide moduan). Horretarako, gure eginkizuna da etengabe hobetzea abangoardiazko pedagogia euskalduna eta unibertsala.

Gure balioak

  • Lege-nortasun propioa duen eskola-entitatea gara.
  • Hezkuntza-komunitate izaera dugu: gurasoek, profesionalek eta laguntzaileek kolaboratzen dugu proiektuaren garapenean.
  • Giza partaidetza: kooperazio bidez kudeatutako eskola gara.
  • Solidarioak gara beste ikastolekin eta jendartearekin.
  • Kultur-identitate euskalduna indartzen dugu, beste kulturekin aberastua.
  • Hizkuntza eta kultura eredu eleanitz integrala lantzen dugu.
  • Integratzailea: pentsaera eta jokaera sozial, politiko, zein erlijioso anitzak integratzen ditugu.
  • Orekatzailea: irekiak gara jatorri, maila sozial eta ekonomiko desberdinetako pertsonei.

Ikastetxearen Proiektu Digitala

Esteka honetan duzue eskuragai Ikastetxearen Proiektu Digitala