Ez zen erraza izan DBHko ikasleek ikas-bidaiak finantzatzeko saltzen zituzten polboroi eta bonboi mitikoak albo batera uztea, Ikastolan urte luzez errotutako ohitura baitzen. Halere, duela zazpi-zortzi urte, Ereindajan kooperatibarekin elkarlean, Aranzadik erabaki zuen bazegoela produktu-salmenta hori beste modu batean egiteko bidea. Urte batetik bestera, auskalo non, nork, zein baldintza edota zer preziotan egindako gozoak saltzetik bertako ekoizleek –gehienek ekoizpen-eredu agroekologian– egindako produktuak saltzera pasa ziren ikasleak.
Erabaki horren atzean Ikastolak bultzatzen dituen baloreak lantzeko apustua egon zen. Hain zuzen ere, orduz geroztik agroekologia, tokiko garapena eta kontsumo arduratsua izan dira ekimenaren zutabe nagusiak.
Hala, azken urteetan herrigintza-ikuspegiarekin jardun dugu lanean, eta Ereindajan (aurrerantzean Elikaenea) arduratu da gurean martxan jarritako eredua herri-mailara zabaltzeaz. Gaur egun Bergarako Elikadura Mahaiak sustatzen du proiektua, eta herriko beste ikastetxeek modu puntual batean parte hartu izan dute. Pozgarria iruditzen zaigu sare hori sortu izana.
Aurten etxez etxe saldu eta herrian zehar banatutako gazta-zati eta otarrak produktu hutsak baino gehiago dira: Aretxabaletako gazta, Aramaioko marmelada, Zestoako patea, Beriaingo pasta eta bidezko merkaritzako txokolatea. Elikagai horien atzean dagoen lana, ikuspegia eta egiteko-modua da, hain justu, ikasleekin landu duguna. Egiten denak besteko garrantzia baitu egiteko moduak.
Ekoizpen- eta kontsumo-eredu baten aldeko keinua da ekimen hau, herri jasangarri eta justuagoa eraikitzeko jartzen dugun aletxoa.
