Udazken honetan ere, euskararen alde egiteko bi aukera eder ditugu eskura: Errigoraren eta Zuberoako ikastolen aldeko Ikaskoliren saski solidarioak. Bi ekimenek helburu bera dute: euskararen transmisioa, herrigintza eta tokiko ekoizpena indartzea. Saski bat erostea produktuak eskuratzea baino askoz gehiago da:
- Euskara babesten duzu: saski hauek erosiz, Zuberoan eta Nafarroa erdi eta hegoaldean euskararen alde lanean ari diren eragileei laguntzen diezu, hizkuntzaren transmisioa eta erabilera indartuz.
- Tokiko ekoizle txikiei sostengua ematen diezu: saskietako produktuak bertako ekoizleek egindakoak dira: artzainak, baratzezainak, kontserbagileak… Saski bat erostean, tokiko lana, artisautza eta lurrari lotutako bizimodua babesten dituzu.
- Euskalgintza eta herrigintza sareak indartzen dituzu: bi kanpainak auzolanean antolatutako herri-ekimenak dira. Saski bakoitzaren atzean pertsona, familia eta kolektibo ugari daude elkarlanean.
- Kontsumo kontziente eta arduratsuaren aldeko hautua egiten duzu: Errigoraren eta Zuberoako ikastolen saskiek elikadura-burujabetza eta tokiko ekonomia sustatzen dituzte.
Ikaskoli
2003az geroztik, Zuberoako Alozeko eta Eperra ikastolek tokiko ekoizleen produktuz osatutako saskiak saltzen dituzte Gabonen atarian. Helburua argia da: Zuberoako ikastolei sostengu ekonomikoa ematea eta euskararen transmisioa bermatzea, bertako ekoizle txikien jarduera indartzearekin batera.
Ekimenak gero eta babes handiagoa du. Iaz, 2.786 saski saldu zituzten, eta salmenta horiei esker 106.000 euro bideratu ziren Zuberoako laborariengana.
Aurten ere hiru saski mota izango dira aukeran, iazko prezioei eutsiz:
- Pettarra – 52 €: ahate-gibela, eztia, ardi-gazta, bixkotx gaziak eta pasta.
- Arbaila – 57 €: eztia, artisau-bixkotxak, bi gazta zati, bixkotx gaziak, marmelada, infusioak eta pasta.
- Basabürüa – 70 €: txerri-patea, ardi-gazta, lukainka lehorra, eztia, gozokiak, sagar-zukua eta pasta.
Eskaera egiteko azken eguna: azaroaren 22a.
Webgunea: ikaskoli.eus
Bilketa: Aranzadi Ikastolan, abenduaren 11tik aurrera. Bilketa-egun eta ordutegi zehatzak aurrerago jakinaraziko ditugu.
Zuberoan euskararen etxeko transmisioa ahultzen ari den honetan, ikastolek ezinbesteko lana egiten dute belaunaldi berriek euskaraz ikasteko eta bizitzeko aukera izan dezaten. Saskien kanpainak, ikastolak laguntzeaz gain, eskualdeko ekonomia eta ekoizle txikien lana ere indartzen ditu.
Errigora
Errigorak martxan du udazkeneko «Nafar hegoaldeko uzta euskarari puzka» kanpaina, aurten «Auzolanean euskara, sustraitik espaziora» lelopean.
Nafarroa erdi eta hegoaldeko euskalgintzari arnasa emateko ekimena da. Saskien balioaren %25 bertako euskalgintza indartzera bideratzen da, besteak beste, AEKren, Agerraldia dinamikaren, Nafarroako ikastolen eta D ereduaren aldeko Sortzen mugimenduaren jarduera babestuz.
Aurtengo kanpainan hiru saski mota eskaintzen dira:
- Saski beltza – 60 €: Nafarroako produktu tradizionalak, hala nola oliba-olioa, pikillo piperrak, zainzuriak, orburuak, ardoa eta bestelako kontserbak.
- Saski berdea – 65 €: produktu ekologikoz osatutako sorta, besteak beste, lekaleak, pasta, oliba-olioa, barazki-kontserbak eta zukuak.
- Saski gorria – 75 €: Gabonetarako aproposa den sorta, ardi-gazta, ardoa, patxarana, turroia, polboroiak eta bestelako produktuekin.
Gainera, aurtengo berritasun gisa, «Euskararen haziak ereiten» egutegi ereingarria eskuratzeko aukera dago, saskiarekin batera, 10 euroren truke. Zenbateko horretatik 5 euro Lodosako Ibaialde Ikastolari laguntzeko erabiliko dira.
Eskaera egiteko azken eguna: azaroaren 12a.
Webgunea: errigora.eus
Bilketa: abenduaren 1ean, Aranzadi Ikastolan (Aranzadiko gurasoen auzolanez).
Errigorak elikadura-burujabetza eta euskararen aldeko kontzientzia komunitarioa uztartzen ditu, ekoizleen eta euskalgintzaren arteko elkarlana sustatuz.
Bi kanpainek erakusten dute elkartasunak eta auzolanak duten indarra. Aranzadi Ikastolatik, familia eta herritar guztiak bi ekimen hauetan parte hartzera animatzen ditugu.
Egin dezagun euskararen alde, saskiz saski!
