Gaztetxoak urduri baina ilusioz beterik aritu ziren ostiralean Bergarako Gaztetxef sukaldaritza-lehiaketan, eta Aranzadi Ikastolako ikasleek protagonismo berezia izan zuten, 24 parte-hartzaileetatik 22 Aranzadiko DBHko ikasleak izan baitziren.
Ekimena Jardun Euskara Elkarteak eta Elikaeneak antolatu dute, Udalaren babesarekin. Aukera polita eman diete gazteei taldean lan egiteko, sormena garatzeko eta sukaldaritzaz gozatzeko.
Aranzadi Ikastolak herriko ekimenetan parte hartzeari berebiziko garrantzia ematen dio, eta pozez hartu du Jardun eta Elikaeneak antolatutako proiektu inspiratzailea.
Lehiaketa giro ezinhobean gauzatu zen, eta epaimahaiak hainbat irizpide kontutan hartu zituen platerak baloratzeko: aurkezpena, zaporea, jatorrizko osagaien erabilera eta talde-lana izan ziren gako nagusiak.
Azken emaitzen ostean, finalerako sailkatu dira hiru talde, eta euren lan bikainak agerian utzi du sukaldaritza gazteen artean geroz eta presenteago dagoen pasioa dela.
Parte-hartzaile guztiek erakutsi duten konpromisoa, gogoa eta trebetasuna txalogarriak dira, eta finalista guztiei zorte ona opa diegu hurrengo erronkari begira!
