Jardun Euskara Elkarteak eta Elikaeneak elkarlanean antolatuta egitasmo berria da Gaztetxef. Hain zuzen ere, talde-lanaren eta sormenaren bidez, gazteak sukaldaritzara gerturatzea du helburu. Aranzadik, egitasmoaren berri izatean, garrantzia handia eman eta ikasleen parte hartzea sustatu du, eta baita lortu ere: 24 parte-hartzaileetatik 22 Aranzadiko DBHko 1. mailako ikasleak izan dira.
Gaztetxoak urduri baina ilusioz beterik aritu dira sukaldaritza-lehiaketan. Ez dute erronka makala izan: ordubeteko epean, epaimahaia goxatzeko platerak prestatu dituzte, Elikaeneak eskainitako produktu ederrekin. Udalaren babesa izan du ekimenak, eta aukera polita izan da gazteek taldean lan egin, sormena garatu eta sukaldaritzaz gozatzeko.
Aranzadi Ikastolak garrantzia handia ematen dio herriko ekimenetan parte hartzeari, eta pozez hartu du Jardun eta Elikaeneak antolatutako proiektu inspiratzailea.
Lehiaketa giro ezinhobean gauzatu da Gaztetxef, eta epaimahaiak hainbat irizpide izan ditu kontuan platerak baloratzeko: aurkezpena, zaporea, jatorrizko osagaien erabilera eta talde-lana izan dira gako nagusiak. Gaztetxoek lan bikaina egin dute, eta agerian utzi dute sukaldaritza gazteen artean ere praktika daitekeela, pasioz eta gogotsu.
Finalean Krokodilo taldea izan da garaile; Paule, Lur, Maite eta Malenek osatutako laukoteak lortu du lehen saria. Bejondeizuela, gazteak! Eta zorionak parte hartzaile guztioi, plazera da herrian antolatzen diren dinamiketan parte hartzeko erakutsi duzuen grina.
Segi gozatzen eta herria egiten!
