Euskarak ez du errealitate bera bizi Bergaran eta Arabako Errioxan, baina hizkuntzarekiko konpromisoa bera da Euskal Herriko 115 ikastoletan. Ikasturtean zehar Euskal Herriaren inguruko lanketa egiten jardun dute DBHko 1. mailako ikasleek; lurraldeak, administrazio-mugak, euskarak dituen errealitateak eta jartzen zaizkion trabak... Gure identitatea eraikitzen jarraitzeko, ezinbestekoa izan da landu dutena.
Ikasturte amaieran egindakoa borobiltzeko aukera izan dute: gutun bidez harremanetan jarri dira Lapueblako Assa eta Bastida ikastolekin. Ezaugarri asko dituzte desberdin, baina beste asko pareko. Komunikazio horrek elkar ezagutzeko gogoa piztu du gazteengan, eta nahi hori errealitate bihurtzeko aukera izan dute!
Lapueblan pasa dituzte bi egun zoragarri, gutun bidez ezagututako kideak aurrez aurre ezagutzen. Esperientzia ederra izan dela diote!
