Errigora ez da saski-salmenta soil bat. Errigora herri-proiektu bat, uneotan erabat ezinbestekoa Nafarroako Ager eremuarentzat. Euskalgintzako eragileek eta tokiko ekoizleek egindako elkarlanari esker, sustengu ekonomikoa lortzeaz gain, Nafarroa erdi eta hegoaldeko euskaldunak ahalduntzeko baldintzak sortu ditu.

Izan ere, zonalde horretan lanean ari diren euskalgintzako eragileak (Ikastolak, AEK, Sortzen eta Agerraldia) ezinbestekoak dira euskararentzat. Euskarak zonaldean arnasa har dezan, bertatik eta bertarako egiten dute lan. Zuhaitz bat balira bezala hizkuntza sustraitzeko lanetan ari dira, baina baita bertako euskaldunek arnasa har dezaten aire kutsatua garbi bilakatzen ere. 

Lanean jarrai dezaten, ezinbestekoak garenak gainontzeko lurraldetako euskaltzaleak gara, eta Bergarako herritarrok erantzun ederra eman dugu aurten ere! Aranzadi Ikastola, Jardun Euskara Elkartea eta Elikaenearen lankidetzari esker, saski mordoa ekarriko dugu Bergarara, eta etxe bakoitzak ordaindutakoaren %25 zuzenean bideratuko du Nafarroa euskalduntzera.

Aranzadiren kasuan, LHko 3. eta 6. mailako gurasoek jardungo dute auzolanean, saskiak jaso eta banatzen.

Zorionak bihotz-bihotzez herrilan honen parte izan garen guztioi: ekoizleak, euskalgintzako eragileak, herriz herri lanean aritu garen boluntarioak eta saskia eskatu dugun herritarrak. Bejondeigula!