HH eta LH 1-2ko haurrek asteazkenetako hamarretakoan jaten dute osoko ogi ekologikoa, Arrasateko Bedoña auzoan mimo handiz, lehengai ekologikoekin eta ore-amarekin egina. Errigora ekimenetik eskuratzen dugun Nafarroako oliba-olio birjina estra ere eskura izaten dute, ogia busti nahi izanez gero.
Hamarretakoaren dinamika inklusiboak ez du soilik haurren aukera-berdintasunean eta elikaduran eragin nahi, hori baino gehiago jasotzen du proiektuak. Hezkuntza-dinamikaren baitan kokatzen dugu, eta ikaste-momentu garrantzitsua da haurrentzat, ardurak eta autonomia lantzen baitituzte.
Horrez gain, pedagogia egin nahi dugu lehen lehen sektorearekin eta lehengaien jatorri eta nolakotasunarekin. Horregatik, 4 eta 5 urteko haurrek Errastiko baserria bisitatu zuten udazkenean, eta 3 urtekoek bertako kide Naiararen bisita jaso dute orain. Goiz ederra pasa dugu: txikiek asko gozatu beraien ogi-opilak egiten, eta Ikastolako sukaldeko labean egin ondoren, pozik eraman dituzte etxera, beraiek egindakoa gurasoei harrotasunez erakutsiz.
Hain justu, aipatu beharra dago Errastiko eskolak Landaola saria irabazi berri duela okindegiaz harago martxan jarri duen pedagogia-proiektuarekin. Bide horretan, Aranzadik ere harrotasunez jaso du berria, lankidetza hau garrantzitsua baita bi eragileontzat.
Mila esker Naiara eta Xabi astero-astero dastatzen dugun ogia maitasun handiz egiteagatik eta Ikastolako haurrekin duzuen begirada eta esku-zabaltasunagatik!
