Bergarako Energia Berriztagarrien Komunitatea da Berener, irabazi asmorik gabeko kooperatiba herritarra, eta trantsizio ekosoziala bideratzea eta energia-burujabetzaren bidean urratsak ematea dira bere helburu behinenak. Lehenengo proiektu gisa autokontsumo partekaturako egitasmoa jarri du martxan, eta etorkizunean trantsizio ekosoziala bultzatzeko bestelako proiektuak lantzea du helburu.
Lehen proiektuari dagokionez, Berener kooperatibak Bergarako bi teilatutan (Osintxuko etxebizitza pribatu batean eta San Martin Eskolan) eguzki-plakak instalatuko ditu laster, eta bertan sortzen den energia inguruko herritar eta kolektiboek erabiltzeko aukera izango dugu, beti ere behar diren baldintza betez gero.
Kooperatibako bazkide izateak trantsizio ekosoziala babestea dakar, eta arrazoi horregatik Aranzadi Ikastola hasiera-hasieratik izan da Benererreko bazkide. Bide horretan, autokontsumo partekaturako proiektu honen atarian, Ikastolako familiak animatu nahi ditu bazkide egitera, ez soilik instalatuko diren eguzki-plakek sortutako energiaren onuradun izateko, baizik eta Berenerren helburu nagusiak sustatzen laguntzeko.
Nola egin Berenerreko bazkide?
Kooperatibako bazkide-erabiltzaile izateko ondorengo ekarpena egin beharra dago:
- Bazkide egiteko, pertsona fisikoek 100 euroko kapital-ekarpena, eta juridikoek 200 euroko ekarpena.
- Urtero 20 euroko kuota, kooperatibaren gastu arruntei aurre egiteko.
Nola izan instalazioen onuradun?
- Kooperatibako bazkide izan behar da.
- Eskuratutako energia bakoitzeko, 100 euroko ekarpen bakarra.
- Urtero 25 euroko mantenu-kuota (asegurua, mantenua...).
- Aurrezkia izango dugu fakturan.
- Zure paketetik kontsumitzen ez dugun energia sare elektrikora joango da, eta zure merkaturatzaileak konpentsazio bat ordainduko dizu.
Esan bezala, Aranzadi Ikastolak hasiera-hasieratik babestu du egitasmoa. Hala, Ikastolako familia guztiak animatzen zditugu trantsizio energetiko jasangarri eta justu baten alde egitera!
Zergatik izan Berenerreko bazkide?
- Tokiko energia garbia: Bergaran sortutako energia berriztagarriaren erabilera zuzena.
- Energia burujabetza: enpresa handien mendekotasuna gutxitzea eta autonomia energetiko handiagoa izatea.
- Ingurumenaren babesa: klima-aldaketaren aurka ekintza zuzena.
- Parte-hartze aktiboa: erabakiak hartzen dituzten komunitateko kide izatea.
- Aurrezpen ekonomikoa: faktura elektrikoa murriztea autokontsumo partekatuari esker.
Informazio gehiago eta izen-ematea: www.berener.eus
